महाराष्ट्राची सर्वात मोठी एकांकिका स्पर्धा!

साडेतीनशे पेक्षा जास्त एकांकिका, आठ केंद्र हजारो कलाकार, तितकेच तंत्रज्ञ, चार दिवसांचा महाउत्सव, जबरदस्त आणि सर्वोच्च आनंदाचा क्षण म्हणजे पारितोषिक वितरण समारंभ, ही ओळख आहे महाराष्ट्राच्या सगळ्यात मोठ्या एकांकिका स्पर्धेची’ अहिल्यानगर महाकरंडक’ रंगभूमीची रणभूमी! २०१३ साली या स्पर्धेला सुरुवात झाली आणि गेल्या १२ वर्षात या स्पर्धेने महाराष्ट्रातच नाही तर देशाच्या बाहेर सुद्धा आपला लौकिक पोहोचवला. पण हे सगळं घडतंय ते या स्पर्धेसाठी येणाऱ्या असंख्य कलाकारांमुळे, रसिकांमुळे, आणि अनेक मान्यवरांच्या आशीर्वादामुळे. म्हणूनच अल्पावधीतच या स्पर्धेने सांस्कृतिक क्षेत्रात स्वतःचा एक मानबिंदू निर्माण केला आहे. स्पर्धा कशी असावी? तर अहिल्यानगर महाकरंडक सारखी असं आज प्रत्येक जण म्हणतो ते कदाचित यामुळेच. कोणतीही गोष्ट सुरू करणे यापेक्षा ती गोष्ट सातत्याने तितक्याच दर्जेदारपणे चालू ठेवणे हे अवघड असते आणि आम्हाला आनंद आहे की आम्ही गेल्या बारा वर्षांपासून स्पर्धेच्या आयोजनाचा हा आलेख सतत उंचावतच ठेवला आहे…आलेल्या प्रत्येक कलाकाराला सकाळचा नाष्टा, दुपारचं जेवण, रात्रीचे जेवण, यासह लांबून आलेल्या कलाकारांसाठी राहण्याची व्यवस्था सुद्धा या स्पर्धेमध्ये केली जाते. या स्पर्धेने फक्त कलाकारांना त्यांचं हक्काचं व्यासपीठ मिळवून दिलं नाही तर त्याच कलाकारांना आपली स्वप्न प्रत्यक्षात साकारण्याची आणि आपल्या भविष्याला एक नवा आकार देण्याची संधी सुद्धा मिळवून दिली आहे. म्हणूनच आज अनेक कलाकार चित्रपट, मालिका आणि आणि इतर माध्यमांमध्ये जाऊ शकले त्यात या स्पर्धेचा खूप मोठा वाटा आहे. आज या स्पर्धेच्या निमित्ताने महाराष्ट्रामध्ये एका नवीन सांस्कृतिक चळवळीला सुरुवात झाली आहे.